ਡਾ. ਰਿਤੂ ਮਿੱਤਲ ਗੁਪਤਾ ਪੀ.ਏ.ਯੂ. ਦੇ ਪਸਾਰ ਸਿੱਖਿਆ ਅਤੇ ਸੰਚਾਰ ਪ੍ਰਬੰਧਨ ਵਿਭਾਗ ਦੇ ਮੁਖੀ ਬਣੇ

ਉੱਘੇ ਖੇਤੀ ਵਿਗਿਆਨੀ ਡਾ. ਰਿਤੂ ਮਿੱਤਲ ਨੇ ਪੀ.ਏ.ਯੂ. ਦੇ ਕਮਿਊਨਟੀ ਸਾਇੰਸ ਕਾਲਜ ਵਿਖੇ ਪਸਾਰ ਸਿੱਖਿਆ ਅਤੇ ਸੰਚਾਰ ਪ੍ਰਬੰਧਨ ਵਿਭਾਗ ਦੇ ਮੁਖੀ ਦਾ ਅਹੁਦਾ ਸੰਭਾਲਿਆ| ਡਾ. ਰਿਤੂ ਮਿੱਤਲ ਖੇਤੀਬਾੜੀ ਵਿਚ ਔਰਤਾਂ ਬਾਰੇ ਸਰਵ ਭਾਰਤੀ ਸਾਂਝੇ ਖੋਜ ਪ੍ਰੋਜੈਕਟ ਦੇ ਯੂਨਿਟ ਸੰਚਾਲਕ ਵੀ ਹਨ| ਉਹਨਾਂ ਨੇ ਖੇਤੀਬਾੜੀ ਯੂਨੀਵਰਸਿਟੀ ਵਿਖੇ 20 ਸਾਲ ਦੇ ਕਾਰਜਕਾਲ ਦੌਰਾਨ ਅਧਿਆਪਨ, ਖੋਜ ਅਤੇ ਪਸਾਰ ਦੇ ਖੇਤਰ ਵਿਚ ਜ਼ਿਕਰਯੋਗ ਕੰਮ ਕੀਤਾ ਹੈ|
ਡਾ. ਰਿਤੂ ਨੇ 12 ਐੱਮ ਐੱਸ ਸੀ/ਪੀ ਐੱਚ ਡੀ ਵਿਦਿਆਰਥੀਆਂ ਦੀ ਖੋਜ ਅਗਵਾਈ ਕਰਨ ਦੇ ਨਾਲ-ਨਾਲ 127 ਯੂ ਜੀ/ਪੀ ਜੀ ਕੋਰਸਾਂ ਦੀ ਪੜਾਈ ਕਰਵਾਈ| ਉਹਨਾਂ ਦੇ ਨਾਂ ਹੇਠ 162 ਵਿਗਿਆਨਕ ਅਤੇ ਪਸਾਰ ਲੇਖ ਅਤੇ 66 ਖੋਜ ਪੇਪਰ ਪ੍ਰਕਾਸ਼ਿਤ ਹੋਏ| ਇਸ ਤੋਂ ਇਲਾਵਾ ਕਿਤਾਬਾਂ ਦੇ 11 ਅਧਿਆਇ, 28 ਪਸਾਰ ਪ੍ਰਕਾਸ਼ਨਾਵਾਂ ਅਤੇ ਕਈ ਕਿਤਾਬਚੇ ਵੀ ਉਹਨਾਂ ਨੇ ਲਿਖੇ| ਵੱਖ ਵੱਖ ਕਾਨਫਰੰਸਾਂ ਵਿਚ 42 ਪੇਪਰ ਪੇਸ਼ ਕਰਕੇ ਡਾ. ਰਿਤੂ ਨੇ ਆਪਣੀ ਹਾਜ਼ਰੀ ਦਰਜ ਕਰਵਾਈ| ਉਹਨਾਂ ਨੇ 88 ਸਿਖਲਾਈਆਂ ਅਤੇ 50 ਕੈਂਪ ਆਯੋਜਿਤ ਕਰਕੇ ਪੇਂਡੂ ਔਰਤਾਂ ਨੂੰ ਸਿੱਖਿਅਤ ਕੀਤਾ| ਨਵ ਨਿਯੁਕਤ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਲਈ ਉਹਨਾਂ ਦੀ ਅਗਵਾਈ ਵਿਚ 32 ਵਰਕਸ਼ਾਪਾਂ ਵੀ ਕਰਵਾਈਆਂ ਗਈਆਂ|
ਡਾ. ਰਿਤੂ 7 ਖੋਜ ਪ੍ਰੋਜੈਕਟਾਂ ਦਾ ਹਿੱਸਾ ਬਣੇ ਜਿਨ੍ਹਾਂ ਵਿੱਚੋਂ 4 ਦੇ ਮੁੱਖ ਨਿਗਰਾਨ ਵੀ ਬਣੇ| ਖੇਤੀ ਵਿਚ ਔਰਤਾਂ ਬਾਰੇ ਸਰਵ ਭਾਰਤੀ ਸਾਂਝੇ ਖੋਜ ਪ੍ਰੋਜੈਕਟ ਨੂੰ ਸੁਚੱਜੇ ਰੂਪ ਵਿਚ ਲਾਗੂ ਕਰਦਿਆਂ ਉਹਨਾਂ ਨੇ 5 ਕਸਟਮ ਹਾਇਰਿੰਗ ਕੇਂਦਰ ਸਥਾਪਿਤ ਕਰਵਾਏ ਅਤੇ ਔਰਤਾਂ ਨੂੰ ਪ੍ਰੇਰਿਤ ਕਰਕੇ ਯੂਨੀਵਰਸਿਟੀ ਦੇ ਗੋਦ ਲਏ ਪਿੰਡਾਂ ਵਿਚ 500 ਤੋਂ ਵਧੇਰੇ ਰਸੋਈ ਬਗੀਚੀਆਂ ਬਣਵਾਈਆਂ| ਉਹਨਾਂ ਦੇ ਕੀਤੇ ਕਾਰਜਾਂ ਬਦਲੇ ਉਹਨਾਂ ਨੂੰ ਐਵਾਰਡ ਆਫ ਅਕਾਦਮਿਕ ਐਂਕਸੀਲੈਂਸ ਨਾਲ ਨਿਵਾਜ਼ਿਆ ਗਿਆ|